З мэтай ушанавання памяці пісьменніка Васіля Ткачова прынята рашэнне надаць яго імя абласному літаратурнаму конкурсу

Так здарылася, што нядаўна пайшоў з жыцця актывіст аддзялення Саюза пісьменнікаў, старшыня журы гэтага конкурсу, аўтар многіх яркіх гумарыстычных і сатырычных твораў, вядомы беларускі празаік, драматург, публіцыст, ганаровы член Саюза пісьменнікаў Беларусі Васіль Ткачоў. З мэтай ушанавання памяці аб Васілю Юр’евічу, cавет аддзялення СПБ прыняў рашэнне ўнесці змяненні ў Палажэнне аб правядзенні конкурсу. Так, з 1 сакавіка 2022 года назва конкурсу гучыць так: “Першы адкрыты конкурс гумарыстычнай і іранічнай прозы і паэзіі імя В.Ю.Ткачова”.

На пасяджэнні cавета аддзялення СПБ быў зроблены дэталёвы аналіз больш 200 творчых работ, атрыманых на конкурс і вызначаны яго першыя лаўрэаты і фіналісты.

Так, у намінацыі КАРОТКАЯ ПРОЗА (гумарыстычнае апавяданне, абразкі; сярод членаў Саюза пісьменнікаў Беларусі) лаўрэатамі сталі: Лілія Вялічка, г. Гомель, Міхась Сліва, г. Рагачоў, Алег Ананнеў, г. Гомель, Аляксандр Атрушкевіч, г. Гомель, Раіса Дзейкун, Гомельскі раён, Іна Спасібіна, г. Гомель. Фіналістамі сталі: Аляксандр Джад, Ганна Атрошчанка і Іна Зарэцкая (усе з Гомеля). Заахвочвальным дыпломам адзначаны Аляксандр Белік, г. Гомель.

У намінацыі ПАЭЗІЯ (байка, пародыя, гумарыстычны верш; сярод членаў Саюза пісьменнікаў Беларусі) лаўрэатамі сталі: Галіна Рагавая, Гомельскі раён, Іна Спасібіна, г. Гомель, Людміла Яськова, г. Добруш, Ала Бялькова, г. Гомель, Дар’я Дарошка, г. Гомель.

У намінацыі КАРОТКАЯ ПРОЗА (гумарыстычнае апавяданне, абразкі; сярод аўтараў - членаў аматарскіх аб’яднанняў) лаўрэатамі сталі: Лілія Краўчанка, г. Хойнікі і Галіна Песенка, г. Добруш. Фіналістам стала Валянціна Бабко-Аляшкевіч, в. Радкава, Салігорскі раён. Заахвочвальным дыпломам адзначаны: Вераніка Акуліч, Акцябрскі раён і Сергей Жарносенка, г. Рэчыца.

У намінацыі ПАЭЗІЯ (байка, пародыя, гумарыстычны верш; сярод аўтараў - членаў аматарскіх аб’яднанняў) лаўрэатамі сталі: Наталля Каліцька, г.п.Капаткевічы Петрыкаўскага раёна, Галіна Трафімава г.Ельск, Валянціна Бабко-Аляшкевіч, в. Радкава, Салігорскі раён, Ірына Чайкова, г.Гомель. Заахвочальнымі дыпломамі адзначаны: Ірына Мартыненка, в. Акцябр, Жлобінскі раён, Міхаіл Яфімаў, г. Гомель, Віталь Талочка, агр. Нівы, Жлобінскі раён, Анатоль Кавалёў (Анатоль Барысаглебскі), г. Гомель.

Савет аддзялення прыняў рашэнне аб публікацыі твораў лаўрэатаў першага адкрытага конкурсу гумарыстычнай і іранічнай прозы і паэзіі імя В.Ю.Ткачова ў альманаху аддзялення, які выйдзе восенню бягучага года. А вось узнагароды лаўрэатам і фіналістам будуць уручаны пры правядзенні вечара славянскай дружбы і гумару ў верасні 2022 года (пад час правядзення XVII міжнароднага фестывалю-свята “Славянскія літаратурныя дажынкі-2022” і Дня беларускага пісьменства ў г.Добрушы, дзе яны выступяць перад чытачамі са сваімі гумарыстычнымі і іранічнымі творамі. Заахвочвальныя дыпломы будуць высланы аўтарам па электроннай пошце.

Адначасова савет абласнога аддзялення Саюза пісьменнікаў Беларусі прыняў рашэнне аб правядзенні “ІІ адкрытага конкурсу гумарыстычнай і іранічнай прозы і паэзіі імя В.Ю.Ткачова”, старт якому будзе дадзены 10 верасня 2022 года, а вынікі будуць падведзены да 1 студзеня 2023 года і прымеркаваны якраз да 75-годдзя з дня нараджэння Васіля Юр’евіча Ткачова.