Прыгожы бухгалтар на многае здатны

Конкурс “Міс калінкавічанка” быў прысвечаны 450-гадоваму юбілею райцэнтра. Пятнаццаць прыгажунь прэтэндавалі на ганаровы тытул. У фінал выйшлі бухгалтар, медыцынская сястра, настаўніца, студэнтка і мастак-афарміцель. На сцэне раённага Палаца культуры канкурсанткі павінны былі прадставіць сябе ў лепшым свеце, прадэманстраваць акцёрскія здольнасці ў якасці гераіні беларускага літаратурнага твора, а таксама ўменне насіць авангардны касцюм і гатаваць фірменны кулінарны шэдэўр… З гэтымі заданнямі лепш за іншых справілася бухгалтар ААТ “Калінкавічыхлебапрадукт” Ірына Графава, якой і дастаўся тытул “Міс калінкавічанка”. “Міс артыстызм” стала мастак-афарміцель Юлія Махнач з “Камунальніка калінкавіцкага”, а “Міс абаяльнасць” — медсястра ЦРБ Алена Пятрычыц.