Душэўныя клёцкі. Дакранаемся да кулінарных традыцый

Прызнаюся: раней пызы я не гатавала. Вырашыла запоўніць гастранамічны прабел. Па-першае, таму, што гэтая страва з каларытнай назвай была ў Беларусі даволі распаўсюджанай, ведаюць яе і ў нашы дні. А па-другое, вельмі люблю бульбу. Розную – вараную, смажаную, тушаную, запечаную… У беларусаў сотні страў з картоплі! Капытка, камы, цыбрыкі, клёцкі, бульбіца, сачні, дранікі… На жаль, большасць з іх ведаю толькі тэарэтычна. Часты госць на стале ў нашай сям’і – дранікі, калі-некалі гатую і бабку ў печы (у духоўцы чамусьці не атрымоўваецца смачнай), спрабавала камы, кішку. На гэтым, напэўна, і ўсё.