Церабаў. Петрыкаўскі раён. Вандроўка восемдзесят другая

Па дарозе ў гэтую палескую вёску мы разважалі: чаму ж яе так назвалі? Мо, тут лён церабілі? А ад мясцовых жыхароў пачулі дзве версіі: багата каля рэчкі Трэмля і іншых вадаёмаў лазы, яе і церабілі, прарэджвалі; а яшчэ ў народзе кажуць, што быў у далёкія часы ўладальнікам гэтай зямлі чалавек з падобным на назву вёскі прозвішчам. Аднак дакладна вядома, што на поўдзень ад цяперашняй вёскі было паселішча Малы Церабаў.